Sökum þess hve fá framboð eru til komandi alþingiskosninga hefur nýtt stjórnmálaafl verið stofnað hér um borð. Ber það nafnið FrystitogaraFlokkurinn og er eins og nafnið bendir til framboð,  til að styrkja alla sjómenn, þó sérstaklega frystitogarasjómenn, en ekki er annað hægt að segja en að þeirra hlutur hafi verið fyrir borð borinn undanfarin ár.

Guðvarður Jakobsson formaður FrystitogarFlokksins

Forsprakki framboðs FrystitogaraFlokksins er Guðvarður Jakobsson, auknefndur Gutti, frystitogarsjómaður á Júlíusi Geirmundssyni ÍS frá Ísafirði. Aðspurður hver væri formaður þessa nýja flokks sagðist hann vera það,  hann hefði heimtað formannsstólinn og fengið hann mótþróalítið. Vitað er samt um aðra sem hafa munstrað sig í þennan flokk sem líta formannsstólinn hýru auga. Nánar um það síðar…

Hvað varðar helstu stefnumál flokksins fyrir komandi þingkosningar eru þau einna helst, að auka kvóta frystiskipa, en hart hefur verið sótt að þeim undanfarin ár. Íslandi verði skipt í ríkjasambönd, Suður, Vestur, Norður og Austur. Vestur fengju lágmark 180.000 tonna kvóta en aðrir landshlutar mun minna. Einnig að sjómannaafslátturinn verði aftur í hávegum hafður og að sjómenn verði á launum þegar þeir eru í fríi.  Svo væri líka baráttumál um að allir sjómenn fengju kók og prins á hverri vakt.

Annars eru okkar helstu baráttumál enn í vinnslu, og tilkynnt verður um uppröðun á listum fljótlega. Boðið verður fram á öllum miðum og djúpum.  Nú er unnið að því að safna undirskriftum meðmælenda og vonast framboðið eftir að fá gott hal á næstunni og þá eru  meðmælendurnir komnir i hús….

Á næstu dögum mun Júllinn fjalla nánar um þetta nýja, og jafnframt mjög svo þarfa framboð